Lakeero’n mai’n ager hotee

Lakeero’n mai’n ager hotee
To mai’n qismat mitaa daitaa
Ager itnaa hee aasaa’n thaa
To mai’n tujh ko bhulaa daitaa
Magar is raah mai’n raahai’n
Sehel itnee nahi’n hotee’n
Kabhi aisaa bhee hotaa hai
Ke menzil bhee nahi’n miltee
Aur Raahai’n bhee nahi’n khotee’n
Ke in raaho’n mai’n hum nay ik nayaa hee baab daikha hai
Ke jaltaa raat kee khunkee mai’n bhee maahtaab daikha hai
Sehel itnaa nahi’n hotaa
Yu’n raah-e-ishq mai’n chalnaa
Hijar gee aag mai’n jalnaa
Lab-e-Khaamosh ki aawaaz dil ke kaan se sun’naa
Ke saari saari rainaa’n bus ridaa-e-khwaab hee bun’naa
Magar kuch aur daikhaa hai
Yaha’n kuch aur daikhaa hai
Dhanak mai’n pyaar kee hum nay
Ke rang ik aur daikhaa hay
Muhabbat mai’n kisi kaa, aur hee kuch taur daikhaa hai
Magar ab kuch nahi’n kehnaa
Usay ab kuch nahi’n kehnaa
Faqat itnaa hee kehna hai
Ke yu’n phir se nahi’n kernaa
Isay gar pyaar kehti ho
Khudaaraa, phir nahi’n kernaa
Ke jeewan beet jaay gaa
Ke din phir se wohi ho’n gay
Ke raatai’n bhee wohi ho’n gee
Magar ye jaan lo jaanaa
Mujhay itnaa hee kehnaa hai
Muhabbat phir nahi’n ho gee!
Muhabbat phir nahi’n ho gee!