Saa'at-e-bekhabar me rehtey hen

Ghazal

Saa'at-e-bekhabar me rehtey hen
Qaed-e-hadd-e-nazar me rehtey hen

Pehley harf-e-dua na milta tha
Ab talaash-e-asar me rehtey hen

Behisi mot hi to hae yaaro
Jism ke murda-ghar me rehtey hen

Aazam-e-safar-e-haqq to hen lekin
Khwahish-e-hamsafar me rehtey hen

Jaan kr bhi ke la-dawa hen hum
Minnat-e-charagar me rehtey hen

Mas'ala tangi-e-qafas ka nahi
Tangi-e-baal-o-par me rehtey hen

Shehr me khoaf ki uraanen hen
Ab prindey shajar me rehtey hen
_________________