Naa koee jazbaa, koee ehsaas naa aawaaz hoo'n

Naa koee jazbaa, koee ehsaas naa aawaaz hoo'n
Aaj phir kyu'n mai'N bharay baazaar mai'n neelaam hoo'n

Phir talaatum khaiz mojo'n se mai'n takraata huaa
Saahilo'n ki rait se mit-ta huaa ik naam hoo'n

Duur hai mujh se mera saaya bhi ab jaata hua
Log hai'n sehmay huway ke gardish-e-ayyaam hoo'n

Kyaa ajab ye khail khaila tuu ne mujh se zindagi
Mujrimo'n ke shehr mai'n mai'N barsar-e-ilzaam hoo'n

Kis hizaaqat se mujhay behlaa ke abb hanstay hai'n wo
Kal talak kehtay rahay is baagh mai'n gul-faam hoo'n

Hasti-e-faani k qisso'n mai'n raha uljha hua
Khaas logo'n k liyay shayad zara kuchh aam hoo'n

Naam jo poochhay koee, Sajid ye keh daina usay
Hoo'n kitaab-e-waqt ka kirdaar, per gumnaam hoo'n